36

ارشاد بھٹی کا پاکستان بھر کے پریس کلبوں میں داخلہ بند۔

ویب ڈیسک

لاہور پریس کلب کی گورننگ باڈی کی طرف سے سیکرٹری لاہور پریس کلب زاہد عابد نے ایک پریس ریلیز جاری کیا ہے جس میں تجزیہ کار ارشاد بھٹی کی طرف سے ملک کے نامور صحافی اور کلب کے لائف ممبر انجم رشید کے ساتھ دنیا نیوز کے ٹاک شو کے دوران بدتمیزی کی شدید مذمت کی گئی ہے۔

کلب کے صدر ارشد انصاری، سینئر نائب صدر ذوالفقارعلی مہتو، نائب صدر ناصرہ عتیق، سیکرٹری زاہد عابد، جوائنٹ سیکرٹری حافظ فیض، خزانچی سالک نواز اور اراکین گورننگ باڈی نے اپنے مذمتی بیان میں کہا ہے کہ پرل کانٹی نینٹل ہوٹل کے سابق پی آر او ارشاد بھٹی کا داخلہ پورے پاکستان کے پریس کلبوں میں بند کردیا گیا ہے کیونکہ ٹی وی چینلز پر تجزیہ کار کا لبادہ اوڑھ کر “ایجنٹ ” کا کردار ادا کرنے والے” پیرا ٹروپر” کو صحافی اپنی صفوں میں برداشت نہیں کرسکتے۔

انہوں نے کہا کہ ارشاد بھٹی کی عمر صحافت میں 40 ہفتے بھی نہیں ہے جبکہ انجم رشید نے 40 برس صحافت میں گزارے ہیں۔ صحافی رہنماؤں نے کہا ہے کہ لاہور پریس کلب کا جو ممبر، ٹی وی اینکر یا پروڈیوسر ارشاد بھٹی کو اپنے ٹاک شو میں شریک کرے گا، اس کے خلاف بھی اظہار ناپسندیدگی کیا جائے گا۔ انہوں نے کہا کہ انجم رشید سیکڑوں سینئر صحافیوں کے استاد ہیں اور جمہوریت پسند قلم مزدور ہیں، ان سے بدتمیزی کسی صورت برداشت نہیں کی جا سکتی۔

اس خبر پر اپنی رائے کا اظہار کریں